حكاية لقاء الألف طفل

السلام عليكم  ورحمة الله وبركاته

الهدف

هدف اللقاء ده اننا نخلق حاجة للولاد دول , حاجة غير المدرس اللي بيروح يذاكر لهم او المتطوع اللي بيروح يوزع عليهم اكل او هدوم او حتى لعب , حاجة يلتفوا حواليها , يلاقوا نفسهم فيها , ممكن تكون لوحة يرسمها طفل بيحب الرسم , او الوان يلون بيها , ممكن تكون دور ف مسرحية يشغل وقته بيه وف وسط الحاجات دي حنقدر نقدم المسابقة الثقافية اللي احنا عايزين نوصلها , وحنخلي لتعلم القران اقيم الجوايز , الحفلة حتكون الطريق اللي نوصل بيه , المدخل يعني اللي يحركة طول الشهر ف انتظار اليوم ده  , أي ولد ف أي بيت عادي مش بيذاكر طول الوقت , عندع اهلة وقرايبة واصحابة بيزورهم او يخرج معاهم , وعنده لعبة الخاصة بتاعتة ولمل يحب يفتح التليفزيون يفتحة او عنده افلام كاتون فيديو او سي دي , كل ولد ف بيتة عنده مساحات كتيرة اوي بيشغل بيها فراغة بيختار اللي يحبة او اللي اهلة بيوجهوا ليه ...

لكن طفل المؤسسات دي عنده ايه؟؟؟

سرير ف عنبر فيه اكتر من عشر اولاد , رف ف دولاب مشترك بين اربع اولاد او اكتر ويمكن ميكونش في كمان , اوضة للانشطة فيها لعب وفيديو وتليفزيون ( بتتفتح ف زيارات الناس المهمة وف مواعيد الموظفين اللي الولد بيكون فيها ف المدرسة اصلا ) مكتبة جميلة للتصوير التليفزيوني ( كل كتبها عهدة ع الموظف بيخاف عليها م الولاد وبيقفلها بالمتاح وهوا مروح) معتقدش انه في حاجة تانية بيمتلكها حتى الهدوم اللي بيجيبها المتبرعين , بياخد اقرب حاجة لمقاسة مع ان انهاردة أي ولد او بنت ف بيتك بيقف ويختار ويتنطط عليك كمان وهوا عنده 8 او 9 سنين مش اكتر وانت نازل معاه تشتري له لبس العيد , يقولك ده موضه  واللون ده مش عاجبني , كل الولاد دول محرومين من كل ده.

احنا بتكلم على ولاد اربع مؤسسات اساسية ( دور التربية – مؤسسة البنين – جمعية المواساة – انقاذ الطفولة ) كده العدد بالاشراف يبقى حوالي 650 ولد وبكمل الالف طفل باولاد جمعيات او دور تانية عشان يكون في فرصة احتكاك اكبر للاولاد.

 اللقاء بتنظمة جمعية بشاير وحضر اللقاء  الاول اللي كان يوم الجمعة 4 فبراير 2005

( دور التربية , الجيزة , المواساة , فتح , زهرة المداين وبشاير )

 وللاسف مقدرناش نجيب انقاذ الطفولة المرة اللي فاتت , اللقاء التاني كان يوم الجمعة 18 مارس 2005 ان شاء الله.

احنا محتاجين ناس متخصصة تلتزم مع  الولاد دول , موظفين مش متبرعين , مش موظفين حكومة زي اللي عندهم لا , موظف يشتغل بجد ولا مشتغلش كويس ندور على حد عيرة , ندربهم ونقدر يكافئهم او نعاقبهم لو قصروا , حنعمل ده ازاي؟؟ وحنجيب المرتبات دي منين؟؟ احنا محتاجين ما لايقل عن 25 الف مرتبات شهرية!

عايزين نسوق المهرجان , المرة اللي فاتت ده حصل فعلا بس بنطاق ضيق , عايزين نوسع ده , لما حتشوفوا البرنامج بتاع اللقاء الاول حتعرفوا مين اللي دخل وكمان عايزاكوا تعرفوا ان الجهات او الشركات دي احنا اللي جايبنها , كل واحد فينا دور ع الناس اللي يعرفها وحاول مرة واتنين وعشرة وميت مرة حتى , بس اكيد في مرة من المرات نجحت , احنا محتاجين رعاة للمهرجان , زي الرعاة بتوع برامج التليفزيون , يصرفوا ع اللقاء ده مقابل الاعلان عنهم وفي معانا جوابات من جمعية بشاير موجهة للشركات ومش بس الشركات معانا جوابات طلب للتغطية الاعلامية , محتاجين تغطية اعلامية من الجرايد وقنوات التليفزيون ومواقع الانترنت كمان , والجامعات محتاجين مشاركة طلبة الجامعة بحضورهم اليوم ده واساتذة الجامعة باستشارتهم سواء ف برنامج اليوم او ف التجهيز لة , زينة وديكورات وتنظيم او حتى ف طرق التسويق له.

ليه كل ده ؟؟ بكبر المواضيع اوي كده ليه مع اننا قدرنا نعمل اللقاء الاول من غير كل ده ....!

عشان اليوم يقدر يقوم بنفسة من غير تبرعات , عشان نقدر نجيب الفلوس اللي حتدفع مرتبات للناس اللي حتابع مع الولاد دول تحت اشرافنا , الشركات عشان تدفع لليوم ده لازم يكون له موصفات معينة تخللي الشركة تقتنع ان ده اعلان جيد , ديكورات حلوة والوان جذابة ويوم منظم وكاميرا محترفين يسجلوا كل ده  وياسلام كمان بقى لو يطلع من اليوم برنامج او حلقة شهرية تتذاع ف التليفزيون , الحلم كبير؟؟